بالدارجة

بالدارجة: “متــــلازمـــــة كـــوتـــــار” وهـــم المـــــوت

كلنا كنتفرجو فالأفلام ديال الرعب والزومبي وكيبان لينا بنادم ميت وغادي كيتحرك ولكن كنقولو هذا مجرد فيلم وآمبوسيبل يكون هادشي بصح ولكن تخيل معايا ايلا قلت لك هادشي بصح تيقني ؟ نمشيو للموضوع…
“متلازمة كوتار” أو “وهم الموت” هاد وهم الموت هو واحد المرض نفسي خطير بزاف كايخلي بنادم يتوهم راسو ميت ويحس براسو ميت بصح ويبدى يشوف الجثة ديالو كتحلل والأعضاء ديالو مقطعة وبدى الجسد ديالو كيتعفن، هنا المريض كيحس براسو ميت وكيهمل راسو حيت ديك الفكرة ديال انه ميت لصقات ليه فدماغو وخضع ليها الجسد ديالو وماعمر ديك الفكرة تحيد ليه من راسو…

نشوفو دابا الأعراض ديال هاد المرض، كاين الوسواس والإكتئاب هنا المريض فاللول فاش يالاه كيشد فيه المرض كيبدى يتوهم شي حوايج مكيتقبلهاش العقل ومكيناش نهائيا ومن بعد كايتطور هاد المرض وكيوصل لواحد المرحلة حادة هنا المريض كيبدى يتخيل راسو كيخسر دم وكيتقطعو الاعضاء ديالو وكيشوف راسو ميت، من بعد المريض كايولي معزول على بنادم ومكيبقاش يحس بالواقع حيت ميت نفسانيا وأكثر ناس لي كيتصابو بهاد المرض هوما الناس لي عندهم سكيزوفرينيا…

نشوفو دابا علاش سميتها “متلازمة كوتار”، وهم الموت أو متلازمة كوتار كترجع لواحد طبيب الأمراض العصبية سميتو “جول كوتار” هاد السيد هو اول واحد كتاشف هاد المرض وسماه فاللول ب”هذيان الإنكار”وفاش كان كيعالج واحد المريضة كتاشف المرض مزيان وسماه “وهم الموت” او “متلازمة كوتار”…هاد الطبيب كان كيعالج واحد السيدة حتى بدات كتقول ليه بلي ضرباتها شي لعنة وبدات كتفقد الدم وبداو يتقطعو الأعضاء ديال الجسد ديالها وقالت ليه بلي مكانتش كتاكل حيت هي ميتة ومن بعد ماتت بجوع…هاد المرض فيه نسب متفاوتة كاينة مرحلة عادية وكاينة مرحلة خطيرة بزاف، المريض لي يالاه بدى فيه المرض كيبدى يمل ويكره حياتو ويحس براسو زايد ناقص ومعندوش دور فالحياة وغير متقل على الكرة الارضية اما فالمرحلة الخطيرة كيدخل فالإكتئاب الحاد وهنا كيبدى يشوف اوهام خطيرة ويشوف راسو ميت واخا هو مابيه والو.

نشوفو دابا الأسباب ديال هاد المرض، كاينة السكيزوفرينيا أي واحد عندو انفصام فشخصية غيتعرض لهاد المرض وكاين سبب خر وكيتعتابر اكبر سبب ممكن يخليك تعيش هاد المرض، هاد السبب هو شي حاذث تعرضتي ليه (شي أكسيدون مثلا) ولكن هاد الحاذثة شفتي فيها الموت يعني (نجوت بأعجوبة) شي حادثة خايبة بزاف، هاد الحاذثة كتخلي فيك واحد الصدمة وهاد الصدمة كتبان بيك من بعد كتبدى توهم بلي راك ميت داك نهار فاش تعرضتي لديك الحاذثة وبلي هادشي لي كتشوف دابا وهاد ناس لي ضايرين بيك مجرد اوهام ونت راك ديجا ميت ونت فعالم الأموات وهادو لي ضايرين بيك مجرد موتى…

كاينة واحد الحالة على هاد المرض، كان واحد دري دار كسيدة بموطور هاد دري فاش طاح تعرض لإصابة فدماغ ديالو ومن بعد داوه لسبيطار وداوا وخرج ولكن هاد دري فاش خرج تقلب 180 درجة وبدى كيطيح ليهم وكيقول ليهم انا ميت وهو مجرد جثة كاتمشى وسط الأموات ولصقات ليه ديك الفكرة فراسو واخا هو ماواقع ليه والو وما ميتش، الدري بقى معزول وبقى كيقوليهم بلي العالم غادي يتدمر وبقى على هاد الحال حتى مات….الخوت ديرو الكاصك الله يرحم الواليدين…

كيفاش نداوا من هاد المرض ؟ بعض الأطباء قالو بلي الحل باش بنادم يداواو من هاد المرض هو يستعملو الأدوية المضادة للإكتئاب ويستعملو الأدوية لي كتعدل المزاج النفسي ونبقاو مرة مرة نستعملو صدمات كهربائية….موهيم هادشي لي كاين هذا هو “وهم الموت” نتمنى يكون الموضوع فالمستوى ونتشاوفو فشي موضوع خر، آه ومتنساوش ديرو الكاصك.

أترك تعليق