كاين بزاف دلكنات الإنجليزية مختلفة وهادشي بسبب الإنتشار الكبير ديال الإنجليزية في العالم، كاين اللكنة الأمريكية، البريطانية، الأسترالية، الاسكتلندية، الكندية، الهندية، الايرلندية، الويلزية…وزيد وزيد
هادشي كيدوخ 🙃 بالنسبة لواحد يلاه باغي ابدا اتعلم الإنجليزية واحتمال اهرب إلى سمع هادشي 😅.
المهم من بين هاد اللكنات الكثيرة كاين جوج هما لي معروفين بزاف ومنتشرين وهما الإنجليزية الأمريكية والإنجليزية البريطانية ولي اليوم جيت نقول لكم الفرق بيناتهم حيت كاين ناس تالفين بين الأمريكية والبريطانية.
أول حاجة خصنا نعرفوها أن اللكنة الأمريكية في الولايات المتحدة US و اللكنة البريطانية في المملكة المتحدة UK جوج من بين أكبر الدول لي كيهدرو الإنجليزية فالعالم.
معروف أن اللغة الإنجليزية تعود في الأصل إلى المملكة المتحدة ولكن ناس لي كيهدرو اللكنة الأمريكية أكثر بكثييير من الناس لي كيهدرو البريطانية، إلى قلبنا فالتاريخ انلقاو أن المستوطنين الأوائل في أمريكا كانو من انجلترا لي كان عندهم الخطاب الروتيكي لي كيركز على تخفيف حرف R وكيرمز للرقي والثراء الحاجة لي مزال عند بعض الناس كيعتقدو أن البريطانية كلاس والأمريكية سوفاج 😅 مكاينش دك لهدرة ديال البريطانية نقية والأمريكية زنقاوية.
البلدان القريبة من بريطانيا وأمريكا ساهمت بشكل كبير في الفرق لي بين اللكنتين مثلا البريطانية تأثرت إلى حد ما باللغة الفرنسية لتواجدها في أروبا
الإختلاف بينهم كاين فأربعة الحوايج لي هما :
1. من الناحية القاموس اللغوي Vocabulary
كنلقاو كلمات كتسمى بالأمريكية فشكل وبالبريطانية فشكل
Holiday –> بريطانية
Vacation –> أمريكية
2. من ناحية التهجئة Spelling
هنا الفرق كيكون فحذف بعض الحروف أو زيادتها ولا تكرارها سواء فالأمريكية ولا البريطانية
Pajamas – Check – Realize – Color –> الأمريكية
Pyjamas – Cheque – Realise – Colour –> البريطانية
3. من الناحية القواعد Grammar
القواعد هي الركيزة ديال أي لغة، بين الأمريكية والبريطانية كاين اختلاف فالقواعد ولكن ماشي كبير
مثلا فحروف الجر Prepositions
On the weekend –> الأمريكية
At the weekend –> البريطانية
فالجمع Plural كاين فرق فالتعامل مع الكلمات لي كتشير لعدد من الأعضاء مثلا كلمة فريق team
My team is winning –> أمريكية
فالأمريكية كيعتبروها كلمة مفردة
My team are winning –> بريطانية
فالبريطانية كيعتبروها جمع مادام أنها كدل على مجموعة من الأشخاص.
في المستقبل Future
الأمريكيون كيخدمو will والبريطانيون كيفضلو shall مع I و we
I will go –> أمريكية
I shall go –> بريطانية
في الماضي Past
الأمريكيون كيخدمو الماضي البسيط Past simple
I went to the shop
البريطانيون كيخدمو المضارع التام Present perfect
I’ve been to the shop
وحتى بعض الأفعال لي هي regular فالأمريكية هي irregular فالبريطانية مثلت Learned –> learnt
4. من ناحية النطق Pronunciation
هنا الفرق واضح فالأمريكية كيكون بزربة والبريطانية لا الفرق فالنطق كاين فأربع حروف هما A R T O
ف A و O كيكون النطق ديالهم خفيف فالأمريكية و غليض فالبريطانية.
ف R فتالي والوسط دلكلمة كتكون باينة فالأمريكية وفالبريطانية لا
ف T فالأمريكية بحال اتنطق D وفالبريطانية بحال حرف ت
👩🏫 نقطة مهمة ناس لي باغا اتعلم الإنجليزية ومعرفينش واش اتعلمو الأمريكية ولا البريطانية أول حاجة خصك تعرف بلدك اللكنة لي متبع من ناحية النظام التعليمي مثلا مصر متبعين الأمريكية كلغة أجنبية أولى والمغرب متبع البريطانية كلغة أجنبية ثانية ومن جهة أخرى خصك تحدد علاش باغي تعلم الإنجليزية إلا كان على ود سفر خصك تعرف البلد لي انت غادي ليه شنو اللكنة لي كيهدرو بيها أو على ود خدمة سول على شركة شنو أصلها مثلا وإلا كنت غي باغي اتعلم وصاف خود جوج دناس واحد كيهدر الأمريكية وواحد كيهدر البريطانية وشوف شنو عجبك على العموم سواء تعلمتي هادي ولا هادي كتبقى أنك تعلمتي اللغة الإنجليزية 😅.
ل حكيمة توفيق
أترك تعليق