“الحصـى” أو الحجر فالكلاوي:
نهضرو على أسباب تكونها بعدا:
الحجر فالكلاوي كيتعتبر من الامراض المنتشرة عند الانسان وكتجي للرجال كتر من النساء، بحيت قريت مؤخرا ان نسبة الرجال لي كيتصابو بيهم كتوصل ل 12% مقارنة مع النساء 5%
كيجي هاد الحجر فالكلاوي لجوج اسباب:
السبب الاول: فاش كتكون زيادة في افراز واحد الكمية ديال بعض المواد في البول بحال اوكزالات الكالسيوم (Oxalate de calcium ) وحمض اليوريك (Acide urique)
السبب التاني: هو فاش كيكون حمض الستريت قليل فالبول وحتى البول كيكون قليل
وهاد الاسباب بجوج هوما لي كينتجو فزيادة تركيز هاد المواد فالبول وبالتالي كيتكون الحجر.
ولكن كاين اسباب بزاف كتخلي بعض الاشخاص اكتر عرضة باش يتصابو بالمقارنة مع الاخرين ومنها:
– زيادة الوزن
– مرض النقرس او (La goutte)
– متلازمة سوء الامتصاص او (Syndrome de malabsorptio)
– المرض المعوي الالتهابي ( Maladie inflammatoire chronique de l’intestin)
– زيادة نشاط الغدد جارات الدرقية أو الدُريقية parathyroides
– الإفراط في شرب المشروبات الغازية والإكثار من أكل الأطعمة التي تحتوي على الأملاح والبروتينات.
وحتى اخد بعض الادوية يقدر تأدي لهاد المرض بحال السلفونامايد (Sulfonamid)، الاندينافير (Indinavir ) والترايمترين(Triamtérène)
وكاين حتى اسباب وراثية لي كتخلي الزيادة في إفراز الكالسيوم أو السستين في البول.
ملي كتسمعو بالحجر فالكلاوي كايصحاب ليكم كاين غير نوع واحد ديال الحجر و لكن كاين انواع بزااف ومكنسميوهمش حجر للاشارة ولكن حصوات.
– حصوات أوكسالات او فوسفات الكالسيوم.
– حصوات حمض اليوريك.
– حصوات فوسفات الامونيوم والماغنيسيوم
– حصوات السستين.
نهضرو دابا كيفاش غادي نعرفو ان عندنا الحجر فالكلاوي او شنو هوما الاعراض ديالهم:
الاعراض كتختالف حسب موقع الحجر أو الحصوات.
كيعاني لي كايجيوه من الم شديد فالجنب السفلي من الظهر ديالو وكيتسمى المغص الكلوي ويقدر يتقيى وحتى يكون نزول ديال الدم مع البول.
غادي تسولني وتقول ليا واخا ها حنا عرفنا عندنا الحجر فالكلاوي شنو خاصنا نديرو ؟
اول حاجة ضروري تمشي عند الطبيب ديالك او الطبيب المختص، اللي غيعطيك تدير فحوصات ديال الدم والبول، فحوص أشعة (راديو، تلفزة، سكانير على حسب) وغادي يحاول يوقف تكون الحجر حيت الحجر كيقدر يرجع عند المصاب بنسبة تقدر توصل حتال 70%.. أما العشوب فيقدروا يكملوا عليك ويديروا ليك فشل كلوي.
اما فيما يخص العلاج فيمكن يكون جراحي أو لاجراحي.
غتقول ليا واخا الجراحي فهمناها ولكن اللاجراحي شنو كتعني ؟
اللاجراحي هو العلاج عن طريق الاكثار من شرب السوائل وخاص ماتكونش قل من 2لتر فالنهار الواحد وهاد السوائل يقدرو يخليو هاداك الحجر الصغير لي ماكيزيدش الحجم ديالهم على نصف سنتمتر يدوزو مع البول، هادي واحد
ثانيا الاقلال من الاملاح والماكلة لي فيها البروتينات والاوكسالات (ريجيم).
معلومة : كاين طرق اخرى فالعلاج كتختلف على حساب حجم الحجر والموقع والاعراض ومنها تفتيت الحجر بالموجات الصادمة من خارج الجسم او تفتيت الحجر عن طريق اختراق الجلد.
محمد أديب
